Տիգրան Պետրոսյանի 85-ամյակին նվիրված շախմատային մրցաշար

12 դեկտեմբերի, 2014

Բեյրութի Հ.Բ.Ը.Մ. Դեմիրճյան կենտրոնում կազմակերպվել էր շախմատի մրցաշար դիվանագետների համար՝ նվիրված շախմատի աշխարհի 9-րդ չեմպիոն Տիգրան Պետրոսյանի 85 ամյակին: Մրցաշարը կազմակերպել էր Լիբանանում ՀՀ դեսպանությունը՝ Հ.Բ.Ը.Մ. Անդրանիկ երիտասարդական միության և Լիբանանի շախմատի ֆեդերացիայի հետ համագործակցությամբ:

Մրցաշարի բացումը կատարել են Լիբանանում ՀՀ դեսպան Աշոտ Քոչարյանը, Անդրանիկ երիտասարդական միության նախագահ Վիգեն Չերչյանը և Լիբանանի շախմատի ֆեդերացիայի փոխնախագահ Ռոլանդ Աքրասսը, ովքեր ընդգծել են Տիգրան Պետրոսյանի անգնահատելի դերը համաշխարհային շախմատի զարգացման գործում, ներկայացնել մանրամասներ նրա փայլուն հաջողությունների և հարուստ շախմատային կյանքի առնչությամբ: Ներկաներին ցուցադրվել է ֆիլմ Տիգրան Պետրոսյանի մասին: Մրցաշարին մասնակցել են Բեյրութում հավատարմագրված մի շարք դեսպանությունների և միջազգային կազմակերպությունների դիվանագետներ և նորկայացուցիչներ, Անդրանիկ շախմատային ակումբի անդամներ:

Մրցաշարն անցել է շվեյցարական համակարգով: Մրցաշարի հաղթող 5 միավորով ճանաչվել է Անդրանիկ շախմատային ակումբի անդամ Միշել Քարամը: Լիբանանում ՀՀ դեսպան Աշոտ Քոչարյանը և Բուլղարիայի դեսպանության ներկայացուցիչ Բոյչո Ստամենովը 4.5 միավորով բաժանել են 2-3-րդ տեղերը: Հաղթողները պարգևատրվել են Տիգրան Պետրոսյանի հուշամեդալներով, իսկ մրցաշարի բոլոր մասնակիցներին հանձնվել են վկայագրեր:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր