Մարդու իրավունքների համընդհանուր հռչակագրի 66-րդ ամյակ

10 դեկտեմբերի, 2014

Դեկտեմբերի 10-ին Բեյրութում Լիբանանի Մարդու և հումանիտար իրավունքի հիմնադրամը՝ FHHRL` Foundation for Human and Humanitarian rights, կազմակերպել էր երեկո նվիրված Մարդու իրավունքների Համընդհանուր Հռչակագրի 66-ամյակին:

Ձեռնարկի բացումը կատարել է հիմնադրամի կանանց հարցերով հանձնաժողովի ներկայացուցիչ Լինա Օսսեյրան: Այնուհետև հիմնադրամի անդամներ Պետեր Հաննան և Մոնա Աքլն ներկայացրել են մանրամասներ Լիբանանում մարդու իրավունքների ոլորտում տիրող իրավիճակի մասին:

Օրվա գլխավոր բանախոս Լիբանանում դեսպան Աշոտ Քոչարյանն իր ելույթում անդրադարձել է հայ ժողովրդի պատմությանը, պատմա-մշակութային արժեքներին և հարուստ ժառանգությանը, ընդգծել է լիբանանահայ համայնքի կարևոր դերակատարությունը հայ-լիբանանյան, ինչպես նաև Հայաստան–սփյուռք գործակցության խորացման և զարգացման գործում:

Դեսպանը իր ելույթի հիմնական բաժինը նվիրել է Հայոց Ցեղասպանությանը, ներկայացրել մանրամասներ ցեղասպանության իրագործման մեխանիզմների և փուլերի, միջազգային ճանաչման շարունակական գործընթացի, 100-ամյակին ընթառաջ տարվող նախապատրաստական աշխատանքների, միջազգային կազմակերպություններում ցեղասպանությունների կանխարգելման և դատապարտման ուղղությամբ իրականացված Հայաստանի նախաձեռնությունների առնչությամբ: Դեսպանն իր երախտագիտությունն է հայտնել Հայոց Ցեղասպանությունը ճանաչած բոլոր երկրներին և միջազգային կազմակերպություններին՝ մասնավորապես Լիբանանի խորհրդարանին, որը Հայոց Ցեղասպանությունը ճանաչած միակ օրենսդիր մարմինն է Միջին Արևելքում:

Եզրափակելով իր ելույթը, դեսպան Քոչարյանը նշել է, որ մարդկության դեմ գործած հանցագործությունները վաղեմության ժամկետ չունեն: Խոսելով թուրքական իշխանությունների ժխտողական քաղաքականության անհեռատեսության մասին, նա ընդգծել է, որ ցեղասպանությունից 100 տարի հետո ողջ հայ ժողովուրդը և միջազգային հանրությունը Թորքիայից սպասում են Օսմանյան կայսրությունում կատարված սարսափելի հանցագործության՝ Հայոց ցեղասպանության ճանաչում:

Միջոցառման ավարտին հանձնվեցին մրցանակներ մարդու իրավունքների պաշտպանության ոլորտում ունեցած նպաստի համար:

Երեկոյին ներկա էին Լիբանանի սահմանադրական դատարանի նախագահը, իրավաբաններ, դատավորներ, դիվանագետներ, հասարակական կազմակերպությունների, մասնավորապես Հայոց ցեղասպանության 100-ամյակի Լիբանանի կենտրոնական մարմնի, Լիբանան-Հայաստան բարեկամության ասոցիացիայի ներկայացուցիչներ, ուսանողներ:

Լիբանանյան լրատվամիջոցները՝ մասնավորապես Նահար օրաթերթը, MTV և Future հեռուստաընկերությունները լայնորեն լուսաբանել են միջոցառումը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր