«Հայրենիք-աշակերտ հարաբերությունները և երկքաղաքացիության օրենքը» միջդպրոցական աշակերտական մեկօրյա դասընթաց-սեմինար

08 փետրվարի, 2014

Փետրվարի 8-ին Հայ կաթողիկե Մեսրոպյան բարձրագույն վարժարանի աշակերտական խորհրդի տեղեկատվական-ուսումնասիրական խմբակը Լիբանանում ՀՀ դեսպանության աջակցությամբ Մեսրոպյան վարժարանի “Ֆարաջյան” լսարանում կազմակերպել էր միջդպրոցական աշակերտական մեկօրյա դասընթաց-սեմինար «Հայրենիք-աշակերտ հարաբերությունները և երկքաղաքացիության օրենքը» խորագրով: Սեմինարին մասնակցում էին սաներ Լիբանանի հայկական 11 կրթօջախներից: ՀՀ և Մեսրոպյան վարժարանի օրհներգներից հետո բացման խոսքով հանդես եկավ Մեսրոպյան վարժարանի աշակերտական խորհրդի նախագահ Մեղրի Չարըգյանը: Ապա Մեսրոպյան վարժարանի տնօրեն պարոն Գրեգուար Գալուստն անդրադառձավ Հայաստան-Սփյուռք հարաբերություններին և կարևորեց լիբանանահայ աշակերտի մասնակցությունը Հայաստան-Սփյուռք հարաբերությունների հետագա զարգացման գործում: Նա շնորհակալություն հայտնեց Լիբանանում ՀՀ դեսպան պարոն Աշոտ Քոչարյանին, սեմինարի դասախոսներին և ձեռնարկին մասնակցող վարժարանների տնօրեններին, ուսուցիչներին և աշակերտներին: Այնուհետև ելույթով հանդես եկավ Լիբանանում ՀՀ դեսպան Աշոտ Քոչարյանը: Դեսպանն ամփոփ ներկայացրեց անկախ Հայաստանի 22-ամյա անցած ուղին, դիվանագիտական ներկայացուցչությունների գործունեությունը, Հայաստան Սփյուռք գործակցության մանրամասները: Դեսպան Քոչարյանը ընդգծեց, որ Հայաստանը պատրաստ է հյուրընկալելու հայ աշակերտներին ՀՀ Սփյուռքի նախարարության կողմից կազմակերպված տարեկան ծրագրերի շրջանակներում, կարևորեց «Արի տուն» ծրագիրը, որը հնարավորություն է ստեղծում մոտիկից ծանոթանալ Հայրենիքին և ՀՀ մշակութային ժառանգությանը: ՀՀ դեսպանը բարձր գնահատեց Մեսրոպյան վարժարանի 75-ամյա աշխույժ և բազմաճյուղ գործունեությունը, որ հանրակրթական առումով ունի իր յուրահատուկ կարևորությունն ու արժեքը: «Ազդակ» օրաթերթի գլխավոր խմբագիր Շահան Գանդահարյանը համառոտ ներկայացրեց Հայաստանի Հանրապետության երկքաղաքացիության օրենքը և նրա կարևոր դրույթները: Դպրոցի տնօրեն Նազարեթ Ջերջերյանն իր ելույթում անդրադառձավ Հայրենիք-աշակերտ հարաբերությունների կարևորությանը: Աշակերտները մի շարք հարցեր տվեցին բանախոսներին և ակտիվ մասնակցեցին զեկուցումներին: Ներկաները դիտեցին տեսաերիզ Հայաստանի մասին:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր