“Մովսես Խորենացու” մեդալի հանձնման հանդիսավոր արարողություն Բեյրութում

03 հոկտեմբերի, 2013

Հոկտեմբերի 3-ին Լիբանանում ՀՀ դեսպանությունում տեղի ունեցավ “Մովսես Խորենացու” մեդալի հանձնման հանդիսավոր արարողություն հայ մամուլի վաստակաշատ ներկայացուցիչներ Սանդուխտ Պերթիզլյանին` Շահանդուխտ, (Լիբանան) և Նորա Արիսյանին (Սիրիա): Հանդիսությանը ներկա էին մտավորականներ, մամուլի, մշակույթի և այլ կառույցների ներկայացուցիչներ:

Բացման խոսքում Լիբանանում ՀՀ դեսպան Աշոտ Քոչարյանը նշեց, որ ՀՀ ղեկավարությունը բարձր է գնահատում մեր հայրենակիցների արժանիքներն ու ավանդը հայապահպանման առաքելության համար: Դեսպանը ընդգծեց, որ «Մովսես Խորենացու» մեդալը շնորհվում է հայ մշակույթի, արվեստի, գրականության, կրթության և բնական գիտությունների բնագավառում ստեղծագործական ակնառու նվաճումների համար և բարձր գնահատեց հայ գրողների և լրատվամիջոցների դերը հայ ինքնության պահպանման ու զարգացման գործում:

Դեսպանը շեշտեց համազգային հիմնահարցերում միասնական լինելու կարևորությունը և համոզմունք հայտնեց, որ օրեցօր հզորացող Հայաստանի Հանրապետության, Արցախի և սփյուռքի միասնական կամքով և ներուժով հնարավոր կլինի հաղթահարել բոլոր մարտահրավերները:

Այնուհետև լրագրող Լորիկ Սապունջյան-Ծատուրյանը ներկայացրեց պարգևատրվածների կենսագրական տվյալները, որից հետո դեսպան Քոչարյանն ընթերցեց ՀՀ Նախագահ Սերժ Սարգսյանի հրամանագիրը և հանձնեց մեդալները:

Դեսպան Քոչարյանն իր շնորհավորանքները հայտնեց նաև «Մովսես Խորենացու» մեդալին արժանացած լիբանանահայ մամուլի վաստակաշատ երկու այլ ներկայացուցիչներին՝ Ժիրայր Դանիելյանին և Համբիկ Մարտիրոսյանին, որոնք մոտակա օրերին իրենց պարգևները կաստանան Հայատանում :

Սանդուխտ Պերթիզլյանը՝ Շահանդուխտը և Նորա Արիսյանն իրենց խորին երախտագիտությունը հայտնեցին ՀՀ Նախագահ Սերժ Սարգսյանին բարձր պարգևի համար: Պարգևատրվածներն իրենց շնորհակալությունը փոխանցեցին նաև ՀՀ սփյուռքի նախարարին և Լիբանանում ՀՀ դեսպանությանը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր