Բողոքի ցույց Լիբանանում Հունգարիայի դեսպանատան առջև

06 սեպտեմբերի, 2012

Սեպտեմբերի 6-ին Բեյրութում հայկական կուսակցությունների երիտասարդական և ուսանողական մասնաճյուղերի հարյուրավոր ներկայացուցիչներ Լիբանանում Հունգարիայի դեսպանության շենքի առջև կազմակերպեցին բողոքի ցույց ազերի մարդասպան Ռամիլ Սաֆարովին հունգարա- ադրբեջանական գործարքի արդյունքում ազատ արձակելու և ադրբեջանական իշխանությունների կողմից նրան ներում շնորհելու և հերոսացնելու կապակցությամբ: Մասնակիցների ձեռքին էր Հայաստանի և Լիբանանի դրոշները, Հունգարիայի կառավարությանն ուղղված պաստառներ հետևյալ կոչերով և բովանդակությամբ՝ «դուք խրախուսում եք Ադրբեջանին իր քաղաքացիների շրջանում սերմանելու ատելություն հայերի հանդեպ», «դուք դառնում եք գործընկեր կատարված հանցագործության հարցում», «ներողություն մի խնդրեք, ճանաչեք Լեռնային Ղարաբաղի Հանրապետությունը»:

Ցույցի ընթացքում ՀՅԴ, Սոցիալ դեմոկրատական հնչակյան և Ռամկավար ազատական կուսակցությունների ղեկավարները հանդիպում ունեցան Լիբանանում Հունգարիայի դեսպան Լասլո Վարադիի հետ՝ վերջինիս հանձնելով բողոքագիր, ոորում դատապարտվում է Հունգարիայի կառավարության կողմից ազերի սպա Ռամիլ Սաֆարովի հանձնումը Ադրբեջանին և վերջինիս կողմից Սաֆարովի ներումն ու հերոսացումը: Բողոքագրում մասնավորապես նշվում է, որ այդ անբարոյական և սադրիչ գործողությունով Ադրբեջանը շարունակում է խրախուսել և արդարացնել հայերի դեմ ատելությունը իր քաղաքացիների շրջանում: Սաֆարովի հանձնումը Ադրբեջանին և նրա հերոսացումը դռներ է բացում նոր հանցագործությունների համար էթնիկական հողի վրա: Այն ապացույց է Ադրբեջանի ապակառուցողական մոտեցմանը Ղարաբաղյան խաղաղ գործընթացի հանդեպ՝ հատկապես զինադադարի հաճախակի խախտումների և ռազմատենչ հայտարարությունների համատեքստում:

Բողոքագրում նշված է նաև, որ հայ և հունգարական ժողովուրդների բարեկամության պահպանման ոգուն համաձայն, կուսակացությունները կոչ են անում Հունգարիային դատապարտելու այդ ամոթալի և վտանգավոր արարքները : Բողոքագրում համոզմունք է հայտնվում, որ Հունգարիայի և միջազգային հանրության կողմից այդ ահավոր անարդարության ոչ լիարժեք դատապարտումը կխարխլի խաղաղության հաստամանն ուղղված ջանքերը: «Ադրբեջանական իշխանությունների սադրանքները բարձրացնում են զինյան հակամարտության հնարավոր սպառնալիքը Կովկասում » - եզրափակում է բողոքագիրը:

Մարդասպան Սաֆարովի գործի վերաբերյալ իրենց վերաբերմունքն են արտահայտել նաև Հայաստան-Լիբանան բարեկամության ասոցիացիան և լիբանանահայ գործարարների միությունը, որոնք հանդես են եկել հայտարարություններով: Նրանք իրենց վրդովմունքն ու խորը հիասթափությունն են հայտնել Հունգարիայի կողմից հայ սպային կացնահարած Ռամիլ Սաֆարովին Ադրբեջանին հանձնելու և Բաքվում նրան ներում շնորհելու փաստի առնչությամբ: Հայտարարություններում ասվում է, որ այդ խայտառակ գործարքը միջազգային պարտավորությունների, միջազգային իրավունքի, արդարադատության սկզբունքի, համամարդկային արժեքների և մարդկային արժանապատվության ոտնահարում է և վտանգում է խաղաղությանն ուղղված բոլոր ջանքերը:

Վերջին օրերին լիբանանյան բազմալեզու մամուլը պարբերաբար անդրադառնում է կատարվածին:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր