Բեյրութում «Թեքեյան» մշակութային միության նախաձեռնությամբ տեղի է ունեցել բանախոսական երեկո՝ «Կիպրոսի խնդիրը և անհայտ կորած անձանց ողբերգությունը» խորագրով

10 մայիսի, 2012

Ս.թ. մայիսի 10-ին Բեյրութում «Թեքեյան» մշակութային միության նախաձեռնությամբ տեղի է ունեցել բանախոսական երեկո՝ «Կիպրոսի խնդիրը և անհայտ կորած անձանց ողբերգությունը» խորագրով:

«Թեքեյան» մշակութային միության նախագահ Հրայր Հովիվյանը բացման խոսքում անդրադարձել է Թուրքիայի ժխտողական քաղաքականությանը: Նա հույս է հայտնել, որ հայերի և կիպրացիների՝ Թուրքիայի հանդեպ ունեցած արդար պահանջներն ապագայում կստանան իրենց արդարացի լուծումը:

Կիպրոսի պատմության մասին պատմող Ֆիլմի ցուցադրումից հետո ելույթով հանդես է եկել Լիբանանում Կիպրոսի դեսպան Հոմեր Մավրոմաթիսը:

Դեսպան Մավրոմմաթիսը ներկայացրել է Կիպրոսի պատմությունը, ապա 1974թ. թուրքական ներխուժման մանրամասները: Դեսպանն նաև անդրադարձել է Կիպրոսի ժողովրդի կրած տառապանքներին և անհայտ կորածների անձնական ողբերգությանը: Նա խոսել է Կիպրոսի թուրքական հատվածում քրիստոնեական մշակութային հուշարձանների անմխիթար վիճակի մասին, որից անմասն չի մնացել նաև հայկական Մակարավանք պատմական համալիրը: Դեսպանը ներկայացրել է Կիպրոսի ժողովրդագրական պատկերը և բարձր գնահատել հայ համայնքի ակտիվ դերակատարությունն երկրի տնտեսական և քաղաքական կյանքում:

Այնուհետև ելույթ է ունեցել Լիբանանում ՀՀ դեսպան Աշոտ Քոչարյանը: Խոսելով Կիպրոսում անհայտ կորածների խնդրի մասին, նա ընդգծել է, որ տասնամյակներ շարունակ Թուրքիան պահպանում է ապակառուցողական մոտեցում այս խնդրի առնչությամբ և մինչ օրս տեղեկություններ չի տրամադրում կորած անձանց մասին : Նա անդրադարձել է նաև Թուրքիայի ժխտողական քաղաքականությանը Հայոց ցեղասպանության ճանաչման հարցում և Թուրքիայի կողմից Հայաստանի հանդեպ շարունակվող անօրինական շրջափակման խնդրին:

Բանախոսեներն իրենց ելույթներում բարձր են գնահատել փոխադարձ հարգանքի և վստահության վրա հիմնված հայ-կիպրական բարեկամական հարաբերությունները: Դեսպանները նշել է երկու երկրների Նախագահների վերջին փոխայցելությունների քաղաքական կարևորությունը: Ընդգծվել է, որ Կիպրոսը Ուրուգվայից հետո երկրորդ պետությունն է, որ 1982թ. ճանաչել և դատապարտել է Հայոց ցեղասպանությունը:

Կարևորվել է Կիպրոսի ԱԳ նախարար տիկին Կոզակու-Մարկուլիսի վերջերս Հայաստան կատարած այցը Հայաստանի և Կիպրոսի միջև դիվանագիտական հարաբերությունների հաստատման 20-ամյակի համատեքստում: Դեսպանների համոզմամբ, բարձր մակարդակի այցերը գերազանց հնարավորություններ են ստեղծում համագործակցության խորացման և ընդլայնման համար բարեկամ երկրների միջև եվրոպական կառույցներում, հատկապես հաշվի առնելով այն հանգամանքը, որ ս.թ. հուլիսի 1-ից Կիպրոսը ստանձնում է նախագահությունը Եվրամիությունում:

Երեկոն ավարտվել է երաժշտական կատարումներով:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր