ՀՀ անկախության 26-ամյակին նվիրված միջոցառում Բեյրութում

23 սեպտեմբերի, 2017

Սեպտեմբերի 23-ին Բեյրութի «Կեմպինսկի Սամերլանդ» հյուրանոցի մեծ հանդիսասրահում Լիբանանում ՀՀ դեսպանության կողմից կազմակերպվել էր ընդունելություն՝ նվիրված ՀՀ անկախության 26-ամյակին:

Միջոցառմանը ներկա էին Լիբանանի նախագահի ներկայացուցիչ, պետական նախարար Նիկոլաս Թուեյնին, Լիբանանի վարչապետի և խորհրդարանի նախագահի ներկայացուցիչները, Տանն Կիլիկիո Կաթողիկե Հայոց կաթողիկոս-պատրիարք Գրիգոր Պետրոս 20-րդը, Լիբանանի հայոց թեմի առաջնորդ Շահե եպս. Փանոսյանը, Մերձավոր Արևելքի Հայ ավետարանական եկեղեցիների միության կենտրոնական մարմնի ատենապետ վերապատվելի Փոլ Հայդոստյանը, տարբեր եկեղեցիներ ներկայացնող հոգևոր առաջնորդներ, Բեյրութում հավատարմագրված դեսպաններ և դիվանագիտական կորպուսի ներկայացուցիչներ, Լիբանանի կառավարության ու խորհրդարանի ներկա և նախկին անդամներ, բանակի գեներալներ, Յունիֆիլի զինծառայողներ, հայ համայնքի տարբեր կառույցների ղեկավարներ, գործարարներ և բազմաթիվ այլ հյուրեր:

Հանդիսությանը ողջույնի խոսքով հանդես եկավ Լիբանանում ՀՀ դեսպան Սամվել Մկրտչյանը, ով ներկայացրեց վերջին 26 տարիներին անկախ Հայաստանի ձեռքբերումները և կառավարության՝ տարբեր ոլորտներում երկրի հետագա զարգացմանն ուղղված ծրագրերը: Դեսպանը հատուկ անդրադարձ կատարեց անցած մեկ տարվա ընթացքում տնտեսության ոլորտում իրականացված բարեփոխումներին՝ ուղղված կանխատեսելի և նպաստավոր ներդրումային միջավայրի ստեղծմանը, առավել լայն տնտեսական շուկաներ ազատ մուտք ապահովելուն:

ՀՀ արտաքին քաղաքականությանն իր անդրադարձում դեսպան Մկրտչյանը ներկայացրեց Հայաստանի արտաքին քաղաքականության հիմնական առաջնահերությունները և առկա հիմնախնդիրները, ինչպես նաև դրանց հաղթահարման ուղղությամբ գործադրվող ջանքերը: Դեսպանը նաև գոհունակությամբ արձանագրեց Հայաստանի և Լիբանանի միջև 1992թ. մարտի 4-ին դիվանագիտական հարաբերությունների հաստատումից 25 տարիներ ի վեր զարգացող և ամրապնդվող հարաբերությունների փաստը և նախանշեց դրանց առավել խորացմանն ուղղված քայլերը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր