Դեսպան Մկրտչյանի հանդիպումը Լիբանանի ԱԳ նախարարի հետ

13 ապրիլի, 2016

Ապրիլի 13-ին Լիբանանում ՀՀ դեսպան Սամվել Մկրտչյանը՝ պաշտոնավարման ստանձնման կապակցությամբ, հանդիպում ունեցավ Լիբանանի արտաքին գործերի նախարար Ջեբրան Բասիլի հետ:
Շնորհավորելով դեսպանին նշանակման կապակցությամբ՝ նախարարը հաջողություն մաղթեց Սամվել Մկրտչյանին իր առաքելության իրականացման ընթացքում:
ՀՀ դեսպանը շնորհակալություն հայտնեց ջերմ ընդունելության համար և Ջեբրամ Բասիլին փոխանցեց ՀՀ արտգործնախարար Էդվարդ Նալբանդյանի ողջույնները:
Դեսպան Մկրտչյանը հավաստիացրեց, որ իր պաշտոնավարության ժամանակ ամենայն ջանք կներդրվի երկու բարեկամ երկրների հարաբերությունները բոլոր բնագավառներում զարգացնելու և ամրապնդելու ուղղությամբ:
Զրուցակիցները բարձր գնահատեցին հայ համայնքի դերը և ներդրումը ինչպես Լիբանանի պետական և հասարակական կյանքի ամենատարբեր ոլորտներում, այնպես էլ հայ-լիբանանյան երկկողմ հարաբերություններում:
Սամվել Մկրտչյանը տեղեկացրեց նախարարին ԼՂ հակամարտության շփման գոտում վերջին իրադարձությունների մասին` ներկայացնելով Ադրբեջանի նախահարձակ գործողությունները և դրանց քաղաքական ու ռազմական հետևանքները: Կարևորվեց միջազգային հանրության դիրքորոշումը հօգուտ հակամարտության բացառապես խաղաղ կարգավորման, ինչպես նաև Ադրբեջանի արկածախնդրության դատապարտման առումներով:
Լիբանանի արտգործնախարարը վստահեցրեց, որ իր երկիրը մշտապես ուշադիր է եղել Հայաստանի դիրքորոշումների առնչությամբ և հնարավորինս աջակցել դրանց, ինչը կարվի նաև այս պարագայում:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր