Դեսպան Քոչարյանը մասնակցեց UNIFIL-ի կազմում խաղաղապահ առաքելություն իրականացնող հայկական զորախմբի հերթափոխի արարողությանը

25 նոյեմբերի, 2015

Նոյեմբերի 25-ին Լիբանանի հարավում գտնվող Շամա զորավանում տեղակայված UNIFIL-ի (The United Nations Interim Force in Lebanon) խաղաղապահ առաքելության արևմտյան բաժնի կենտրոնակայանում տեղի ունեցավ հայկական զորախմբի հերթափոխի ավարտման պաշտոնական հանդիսությունը:

Ծառայության ավարտից հետո հայ խաղաղապահների 2-րդ զորախումբը լիազորությունները փախանցեց Շամա ժամանած հաջորդ՝ 3-րդ զորախմբին: Միջոցառմանը ելույթներով հանդես եկան Լիբանանում ՀՀ դեսպան Աշոտ Քոչարյանը, 2-րդ զորախմբի հրամանատար մայոր Վահան Ավագյանը, կենտրոնակայանի հրամանատար՝ բրիգադի գեներալ Ֆրանկո Ֆեդերիչին:

Գեներալ Ֆեդերիչին շնորհակալության հայտնեց հայ խաղաղապահներին իրենց առաքելությունը բարձր մակարդակով իրականացնելու համար:

Դեսպան Քոչարյանը իր ելույթում նշեց, որ «Հայաստանի ներգրավվածությունը միջազգային խաղաղապահության ոլորտում աստիճանաբար ընդլայնվում է թե՛ աշխարհագրության, թե՛ քանակական և թե՛ որակական իմաստով: Հայաստանը միջազգային խաղաղապահության և անվտանգության ակտիվ ներդրող է հանդիսանում` կուտակելով զգալի փորձ»:

Դեսպանը բարձր գնահատեց միջազգային կազմակերպությունների և երկրների, մասնավորապես, Իտալիայի դերակատարությունը Հայաստանի խաղաղապահ կարողությունների ստեղծման և զարգացման գործում: Ավարտելով իր ելույթը, դեսպան Քոչարյանը երախտագիտության խոսքեր արտահայտեց իտալական հրամանատարության հասցեին, շնորհավորեց ծառայությունն ավարտող հայ խաղաղապահներին և բարի ծառայություն մաղթեց պարտականությունները ստանձնող նոր զորախմբին:
Պաշտոնական հանդիսությունը եզրափակվեց հայ խաղաղապահների 2-րդ զորախմբի զինծառայողների պարգևատրմամբ, որոնց հանձնվեցին ՄԱԿ-ի հատուկ մեդալներ` առաքելությունը հաջող ավարտելու համար:

Միջոցառմանը ներկա էին Լիբանանի զինված ուժերի ներկայացուցիչը, զորավանի սպայական անձնակազմը, մի շարք երկրների խաղաղապահներ:

Տեղեկանք. 2014թ.-ի նոյեմբերից, միանալով UNIFIL-ի ընտանիքին իտալական զորախմբի կազմում, հայ խաղաղապահներն իրականացնում են իրենց կարևոր առաքելությունը Լիբանանի Շամա քաղաքում տեղակայված ՄԱԿ-ի զինավանում, նպաստելով անվտանգության ամրապնդմանը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր