Հայոց ցեղասպանության 100-րդ տարելիցին նվիրված կլոր սեղան Բեյրութում

30 մարտի, 2015

Ս.թ. մարտի 30-ին Բեյրութի իրավաբանների կենտրոնում ՀՅԴ Զավարյան Ուսանողական Միության նախաձեռնությամբ տեղի ունեցավ Հայոց ցեղասպանության 100-րդ տարելիցին նվիրված կլոր սեղան` «Հայ դատը և միջազգային արդարությունը տարածաշրջանում քաղաքական փոփոխությունների լույսի ներքո» խորագրով:
Իրավաբանների սինդիկատի նախագահ Ժորժ Ժրեյժը իր խուսքում նշեց, որ հայ ժողովուրդը չի մոռանում սեփական պատմությունը, որն արժանի է հարգանքի և պատմական արդարության վերականգնմանը: Նա ընդգծեց լիբանանահայության դերակատարությունը երկրի զարգացման և տնտեսական վերելքի գործում: Ժրեյժը նշեց, որ լիբանանցի ժողովուրդը այլ փոքրամասնությունների հետ միասին երիտթուրքերի վարած քաղաքականության զոհը դարձան:
Եզրափակելով իր խոսքը Ժրեյժը նշեց, որ Թուրքիան պարտավոր է ճանաչել Հայոց ցեղասպանությունը և հատուցում տրամադրել հայերին:
Լիբանանի խորհրդարանի պատգամավոր Ղասսան Մուխայբերը, խոսելով երիտթուրքերի վարած քաղաքականության մասին, նշեց, որ եթե հայությունը ցեղասպանության ենթարկվեց թուրքի սրով, ապա Լիբանանի ժողովուրդը ցեղասպանի կողմից սովի մատնվեց, որին զոհ դարձան բնակչության 40 տոկոսը: Վերջում նա ասաց. «Մենք բոլորս հայ ենք, բոլորս պահանջում ենք արդարություն և ճշմարտություն հայ ժողովուրդի համար»:
Հաջորդ ելույթ ունեցողը դոկտոր Լեյլա Ռահբանին էր, ով անդրադարձավ Թուրքիայի ապագա դերակատարությանը և դրա ազդեցությանը հայկական հարցի վրա:
Հանդիպման վերջում ելույթ ունեցավ ՀՅԴ Լիբանանի կենտրոնական կոմիտեի ներկայացուցիչ, պատգամավոր Հակոբ Բագրատունին: Նա նշեց, որ բոլոր արաբական երկիրները պարտավոր են ճանաչել Հայոց ցեղասպանությունը, որովհետև արաբական աշխարհը նույնպես 4 դար ապրել է օսմանցիների լծի տակ` կրելով ամեն տեսակի հալածանքներ: Հակոբ Բագրատունին կոչ ուղղեց ներկաներին՝ պահանջել Լիբանանի կառավարությունից, որպեսզի ապրիլի 24-ը հայտարարվի ցեղասպանության դեմ ազգային զորակցության օր:
Ի նշան երախտագիտության, հանդիպման ավարտին Ժորժ Ժրեյժին, Ղասսան Մուխայբերին և Լեյլա Ռահբանիին հանձնվեցին պարգևներ:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր