Հայ կաթողիկե պատրիարքարանի նախաձեռնած հիշատակի հանդիսություն` Հայոց ցեղասպանության 100-րդ տարելիցի առթիվ

09 մարտի, 2015

Ս.թ. մարտի 9-ին NDU համալսարանի հանդիսություննների սրահում Հայ կաթողիկե պատրիարքարանի նախաձեռնությամբ և Լիբանանի կաթողիկե պատրիարքների և եպիսկոպոսական խորհրդի հովանավորությամբ տեղի ունեցավ Հայոց ցեղասպանության 100-րդ տարելիցին նվիրված հուշ երեկո: Երեկոյի բացումը կատարեց հասարակական գործիչ Ջորջ Քորդահին: Նա արաբերենով արտասանեց Ցեղասպանության զոհ` մեծ բանաստեղծ Սիամանթոյի «Ափ մը մոխիր» ստեղծագործութունը, ապա, անդրադարձավ հայ ժողովրդի պատմությանը: Հայ կաթողիկե պատրիարքության անունից ելույթ ունեցավ հայր Գևորգ Ծ. վարդապետ Եղյայանը: Այնուհետև ասմունքով ելութով հանդես եկավ մարդկության դեմ դարերի ընթացքում իրականացված բռնությունների և ոճրագործությունների վերաբերյալ մի շարք աշխատությունների հեղինակ լիբանանցի բանաստեղծ Անտուան Ռաադը:
Ելույթ ունեցավ Լիբանանի նախկին վարչապետ, «Ազատ հայրենասիրական շարժում» կուսակցության ղեկավար Միշել Աունը, իր խոսքում նշեց, որ հայ ժողովուրդը տառապանքներ և զրկանքներ է ունեցել Օսմանյան կայսրությունում` ենթարկվելով ատելության և հալածանքների: Միշել Աունը ընդգծեց, որ 1915 թվականին հայությունը զոհ գնաց այն գաղափարախոսությանը, որը միտված էր Թուրքիայում ապրող բոլոր ազգությունների և կրոնների բնաջնջմանը: Նա ցավ հայտնեց, որ արևմտյան պետությունները հայության բնաջնջման փաստին մոտեցան դիտորդի կարգավիճակով: Ըստ գեներալ Աունի, անցյալի ոճիրների ուրացումը թույլ տվեց, որ ոճրագործ ուժերը հետագայում ևս իրագործեն ջարդեր և անպատիժ ավերեն ամբողջական քաղաքակրթություններ: Այնուհետև ելույթ ունեցավ Լիբանանի նախկին նախագահ Ամին Ժմայելը: Նա նշեց, որ միջազգային հանրությունը պարտավոր է ճանաչել և դատապարտել անցյալում իրականացված և ներկայումս էլ շարունակվող զանգվածային բնաջնջման բոլոր գործողությունները, որպեսզի հնարավոր լինի կանխել դրանց կրկնությունը ապագայում: Ամին Ժմայելը բարձ գնահատեց լիբանանահայության ներդրումը Լիբանանի գոյատևման և զարգացման գործում` շեշտելով, որ երկխոսության և համագործակցության հայկական ավանդույթը Լիբանանի ինքնության և գոյության հիմքերից մեկն է:
Ապա ներկաներին իր պատգամը հղեց մարոնիների պատրիարք Բշարա Ռայը: Պատրիարքը իր զորակցությունը հայտնեց Հայոց ցեղասպանութեան 100-րդ տարելիցի առիթով հայտարարված «Հիշում եմ և պահանջում» կարգախոսին:
Երեկոն փակեց Տանն Կիլիկիո Հայոց կաթողիկոս-պատրիրարք Ներսես Պետրոս ԺԹ-ն: Երեկոյին ներկա էին քաղաքական կուսակցությունների ղեկավարներ, կրոնական առաջնորդներ, հասարակական կազմակերպությունների ներկայացուցիչներ, ՀՀ դեսպանության անձնակազմը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր