Սումգայիթյան եղեռնագործության 27-րդ տարելիցին նվիրված միջոցառում Լիբանանում

01 մարտի, 2015

Ս.թ. մարտի 1-ին Բեյրութի Սուրբ Նշան Մայր եկեղեցում մատուցված Սուրբ պատարագից հետո կատարվեց հոգեհանգստյան կարգ, որը նվիրված էր 1988 թ. Սումգայիթի եղեռնագործության անմեղ զոհերի հիշատակին:
Ներկաներին դիմեց Լիբանանի Հայոց թեմի առաջնորդ Շահե եպիսկոպոս Փանոսյանը: Նա խոսեց հայ բնակչության հանդեպ Սումգայիթում կատարված անմարդկային ոճռագործության մասին և նշեց, որ հայ ժողովուրդը պարտավոր է համախմբվելու և միասնական գործելու՝ հատկապես Հայոց ցեղասպանության 100-ամյակի նախաշեմին:
Ապա եկեղեցու բակում ելույթներով հանդես եկան Ռաֆայել Ումուդյանը՝ Հայոց ցեղասպանության 100-ամյակի Լիբանանի կենտրոնական մարմնի անունից և Լիբանանում ՀՀ դեսպան Աշոտ Քոչարյանը: Ռաֆայել Ումուդյանը նշեց, որ սումգայիթյան եղեռնագործությունը մանրապատկերն է հայոց ցեղասպանության և որ անպատժելիությունն ու միջազգային դատապարման բացակայությունը ժամանակակից պայմաններում բերում են նոր ջարդերի և էթնիկական զտումների: Խոնարհվելով նահատակված հայորդիների հիշատակի առջև, նա հաջողություն մաղթեց Հայոց բանակին և հայ խաղաղապաներին, որոնք իրենց ծառայությունն են իրականացնում Լիբանանում՝ ՄԱԿ-ի խաղաղապահ զորքերի կազմում:
Լիբանանում ՀՀ դեսպան Աշոտ Քոչարյանը նշեց, որ 27 տարի առաջ Սումգայիթում հայ բնակչության հանդեպ տեղի ունեցած եղեռնագործությունը էթնիկական զտման քաղաքականության առաջին դրսևորման օրինակներն էին Խորհրդային Միության տարածքում: Խոսելով ԼՂ ազատագրական պայքարի մանրամասների մասին, դեսպանը ընդգծեց, որ Լեռնային Ղարաբաղի ժողովուրդն ազատ ապրելու իրավունքը ստիպված է եղել պաշտպանել արյան գնով` իրեն պարտադրված պատերազմի ընթացքում: Դեսպանը նշեց, որ ներկայումս Արդրբեջանի իշխանությունները շարունակում են ագրեսիվ և ապակառուցողական քաղաքականությունը և հակահայկական քարոզչությունը՝ ռազմատենչ հայտարարությունների, սահմանային սադրիչ ոտնձգությունների, զինադադարի խախտումների և պատմական փաստերի խեղաթյուրման եղանակով: Դեսպանը ընդգծեց Հայոց ցեղասպանության 100-րդ տարելիցին նվիրված միջոցառումները համակարգող պետական հանձնաժողովի հերթական նիստի արդյունքում ընդունված համահայկական հռչակագրի կարևորությունը մեր ժողովրդի միասնականության և համախմբվածության համատեքստում: Նա համոզմունք հայտնեց, որ միայն միասնական կամքով և հավաքական ուժով կարելի է հզորացնել Հայրենիքը և ապահովել մեր բոլոր հայրենանվեր և ազգանվեր իղձերի և ծրագրերի իրականացումը:
Միջոցառման ավարտին Լիբանանում ՀՀ դեսպանության և Հայոց ցեղասպանության 100-ամյակի Լիբանանի կենտրոնական մարմնի կողմից Սուրբ Նշան Մայր եկեղեցու բակում տեղադրված Սումգայիթի զոհերի հիշատակին նվիրված խաչքարի առջև զետեղվեցին ծաղկեպսակներ:
Միջոցառմանը ներկա էին պատգամավորներ, պաշտոնյաներ, հայկական կուսակցությունների և ազգային կառույցների ղեկավարներ, Լիբանանում ՀՀ դեսպանության անձնակազմը, Մերձավոր Արևելքում ԼՂ ներկայացուցիչը, Հայոց ցեղասպանության 100-ամյակի Լիբանանի կենտրոնական մարմնի և լրատվամիջոցների ներկայացուցիչներ:
Նույն օրը Մեծի Տանն Կիլիկիո կաթողիկոսության Սուրբ Գրիգոր Լուսավորչի Մայր տաճարում Ն.Ս.Օ.Տ.Տ կաթողիկոս Արամ Ա-ի նախագահությամբ կատարվեց հոգեհանգստյան կարգ՝ նվիրված Սումգայիթի եղեռնագործության անմեղ զոհերի հիշատակին:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր