Հայոց ցեղասպանության մասին գիտաժողով Զմմառի միաբանության վանքում

14 փետրվարի, 2015

Ս.թ. փետրվարի 14-ին Տանն Կիլիկիո Կաթողիկե hայոց պատրիարք Ներսես Պետրոս XIX բարձր հովանավորությամբ և Հայոց ցեղասպանության 100-ամյակի Լիբանանի կենտրոնական մարմնի նախաձեռնությամբ Զմմառի արծիվյան միաբանության վանքում տեղի է ունեցել «Հայոց ցեղասպանությունը և արխիվները» թեմայով գիտաժողով: Գիտաժողովի մասնակիցներին տեսաուղերձով ողջույնի խոսք է հղել ՀՀ սփյուռքի նախարար Հրանուշ Հակոբյանը: Բացման խոսքով հանդես է եկել Ներսես Պետրոս 19-րդ պատրիարքը, ով կարևորել է արխիվների դերը Հայող ցեղասպանության մասին ամբողջական պատկերացում ունենալու հարցում: Այնուհետև ներկաներին իր ողջույնի խոսքն են ուղղել Զմմառի վանքի մեծավոր Գաբրիել Մուրադյանն ու Հայոց ցեղասպանության 100-ամյակի Լիբանանի կենտրոնական մարմնի ներկայացուցիչ Ռաֆայել ՈԻմուդյանը:

Ցեղասպանագետ Հարություն Ռեմոն Գևորգյանը ներկայացրել է գիտաժողովի առաջին զեկույցը, որը հիմնված է եղել Հայոց ցեղասպանության վերաբերյալ օտարերկրյա դիվանագիտական և միսիոներական արխիվային փաստաթղթերի վրա: Այնուհետև Վարդան Գազանչյանը ներկայացրել է Հայոց ցեղասպանությանն առնչվող փաստաթղթեր Վատիկանի գաղտնի արխիվներից: Դամասկոսի և Եգիպտոսի հայոց թեմերի առաջնորդներ Արմաշ Նալբանդյանը և Արմեն Մազլումյանը մանրամասներ են ներկայացրել Սիրիայի և Եգիպտոսի հայության կողմից 100-ամյակի առթիվ տարբեր ուղղություններով տարվող աշխատանքների վերաբերյալ: Պրոֆեսոր Վահրամ Շամեսյանն անդրադարձել է Հայոց ցեղասպանությանն առնչվող Միջին Արևելքի հայկական արխիվներին, որոնք պարունակում են նյութեր Կահիրեի, Կիլիկիայի կաթողիկոսության, Բաղդադի և Երուսաղեմի արխիվներից:

Իր զեկույցում Երևանի մատենադարանի գլխավոր ավանդապահ Գևորգ Տեր-Վարդանյանը մասնակիցներին ներկայացրել է տեղեկություններ Հայոց ցեղասպանության պատճառով անհետացած հայկական մշակութային ձեռագիր մատյանների և կրոնական գրքերի վերաբերյալ: Գիտաժողովի վերջին զեկույցը նվիրված է եղել Մարդինի Հայ կաթողիկե առաջնորդ Իգնատիուս արքեպիսկոպոս Մալոյանի կյանքին և նահատակությանը՝ զեկուցող Անդրանիկ Ծ. Վարդապետ Կռանյան:

Գիտաժողովին մասնակցել են Լիբանանում Սուրբ Աթոռի նվիրակը, Լիբանանում ՀՀ դեսպան Աշոտ Քոչարյանը, Լիբանանի հայոց թեմի առաջնորդը, մարոնի պատրիարքի ներկայացուցիչը, Հայոց ցեղասպանության 100-ամյակի Լիբանանի կենտրոնական մարմնի անդամները, լիբանանյան համալսարանների իրավագիտության և պատմության բաժինների պատասխանատուներ և դասախոսներ, մարդու իրավունքների մասնագետներ:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր