Հայոց ցեղասպանության 100-ամյակին նվիրված գիտաժողով

01 փետրվարի, 2015

Ս.թ. հունվարի 31-ից փետրվարի 1-ը Բեյրութի Հայկազյան համալսարանում տեղի ունեցավ գիտաժողով <<Հայոց Ցեղասպանության Հարյուրամյակ.Հետևանքներ և Առաջադրանքներ>> խորագրով: Այն կազմակերպվել էր Հայոց ցեղասպանության 100-ամյակի Լիբանանի կենտրոնական մարմնի և Հայկազյան համալսարանի նախաձեռնությամբ: Գիտաժողիվին հրավիրվել էին բանախոսներ Հայաստանից, Լիբանանից և Թուրքիայից: Ներկաներին իր ողջույնի խոսքը փոխանցեց Հայկազյան համալսարանի նախագահ, վերապատվելի դոկտոր Փոլ Հայդոստյանը: Հայոց ցեղասպանության 100-ամյակի Լիբանանի կենտրոնական մարմնի անունից խոսեց <<Ազդակ>> օրաթերթի գլխավոր խմբագիր Շահան Գանդահարյանը: Առաջին օրվա բանախոսն էր Լիբանանի համալսարանի գրականության, հումանիտար և սոցիալական գիտությունների դոկտորական դպրոցի պրոֆեսոր Մասուդ Դահերը, ով հանդես եկավ <<Հայկական Հարցի միջազգայնացման դարաշրջանը. Ներկան և հեռանկարները>> զեկույցով: Հայոց ցեղասպանության թանգարան-ինստիտուտի փոխտնօրեն Սուրեն Մանուկյանը անդրադարձավ Հայոց ցեղասպանության ժողովրդագրական, մշակությանին, հոգեբանական, աշխարհագրական, տնտեսական և քաղաքական հետևանքներին, իսկ ՀՀ Սահմանադրական Դատարանի ավագ խորհրդատու Վլադիմիր Վարդանյանը՝ միջազգային իրավունքի շրջանակներում Հայոց Ցեղասպանության հետևանքների վերացման խնդրին: Գիտաժողովի երկրորդ օրը ելույթներով հանդես եկան Լիբանանը ներկայացնող, Հայոց ցեղասպանությանը նվիրված մի շարք աշխատությունների հեղինակներ դոկտոր Զավեն Մսըրլյանը և դոկտոր Սալեհ Զահրեդդինը: Նրանց զեկույցների թեմաները հետևյալն էին. <<Միջազգային հանրության պայքարը Հայոց Ցեղասպանության ընթացքում և Հայոց Ցեղասպանությունից հետո>> և <<Հայոց Ցեղասպանության շահարկումը պետությունների կողմից Թուրքիայի դեմ>>: ՀՀ ԱԳՆ սահմանակից երկրների վարչության պետ Արսեն Ավագյանը ներկայացրեց հայ-թուրքական հարաբերությունները 1991-2014 թթ.-ին, իսկ լրագրող Թաթուլ Հակոբյանը խոսեց հայ-թուրքական ոչ պետական հարաբերությունների մասին:Եզրափակիչ ելույթներով հանդես եկան Ստամբուլի Բիլքի համալսարանի պատմության բաժնի վարիչ Բյուլենթ Բիլմեզն ու ազգագրագետ Հրանուշ Խառատյանը: Բյուլենթ Բիլմեզն անդրադարձավ 1923-2014 թթ. փոքրամասնությունների հանդեպ Թուրքիայի Հանրապետության որդեգրած կեցվածքին, իսկ Հրանուշ Խառատյանը՝ ժամանակակից Թուրքիայում հայերի կարգավիճակին և իսլամացված հայերի խնդրին: Գիտաժողովի ընթացքում եղան քննարկումներ և մտքերի փոխանակումներ:Գիտաժողովի աշխատանքներին մասնակցեցին Լիբանանի խորհրդարանի անդամներ, պաշտոնյաներ, Լիբանանում ՀՀ դեսպանության ողջ անձնակազմը՝ դեսպան Աշոտ Քոչարյանի գլխավարությամբ, գիտնականներ, մտավորականներ, հասարակական կազմակերպությունների և լրատվամիջոցների ներկայացուցիչներ:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր