Հայկական օր LIQAA քաղաքակրթությունների երկխոսության միջազգային կենտրոնում

16 նոյեմբերի, 2013

Նոյեմբերի 16-ից 18-ը Բեյրութի LIQAA քաղաքակրթությունների երկխոսության միջազգային կենտրոնում, հովանավորությամբ Հույն կաթողիկե եկեղեցու Պատրիարք Գրոգորիոս Գ-ի, կազմակերպվել էր երկրորդ միջազգային համագումարը՝ «Հավատ և արժեքներ բանահյութության միջոցով, երկխոսութան լեզու քաղաքակրթությունների միջև» կարգախոսով՝ Օմանի Սուլթանության, Լիբանանի, Միացյալ Թագավորության, Ֆրանսիայի և Հայաստանի պաշտոնյաների և փորձագետների մասնակցությամբ:
Համագումարի երկրորդ օրը՝ նոյեմբերի 17-ը, նվիրված էր Հայաստանին: Բացման խոսքով հանդես է եկել Պատրիարք Գրոգորիոս Գ-ն, ով մեծապես գնահատել է հայ ժողովրդի ներդրումը համամարդկային արժեքների ստեղծման և զարգացման գործում:
Լիբանանում ՀՀ դեսպան Աշոտ Քոչարյանն իր խոսքում ներկայացրել է որոշ մանրամասներ հայ ժողովրդի պատմության և հայ մշակույթի հարուստ ժառանգության, ինչպես նաև հայ-լիբանանյան բարեկամական հարաբերությունների մասին:
Հայաստանի մասին ֆիլմի ցուցադրությունից հետո, հայկական ժողովրդական բանահյուսության մասին՝ «Հայրենասիրական արժեքները հայ ժողովրդական բանահյուսության մեջ» թեմայով ելույթ է ունեցել ազգագրագետ, ՀՀ ԳԱԱ հնագիտության և ազգագրության ինստիտուտի, արդիականության ազգաբանության բաժնի առաջատար գիտաշխատող, դոկտոր Հարություն Մարությանը:
Երեկոյի երաժշտական մասում Կոմիտասի ստեղծագործություների կատարմամբ հանդես է եկել Լիբանանի սիմֆոնիկ նվագախմբի ջութակահար Բորիս Միրզոյանը, իսկ Լիբանանի ՀԲԸՄ «Արին» պարախումբը ներկայացրել է հայկական ազգագրական պարեր:
Հանդիսությանը ներկա էին օտարերկյա հյուրեր, դիվանագետներ, հայ համայնքի տարբեր կառույցների և հասարակական կազմակերպությունների ղեկավարներ ու ներկայացուցիչներ, հոգևոր հայրեր:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր