Խաչքարի բացում Բեյրութում

23 մայիսի, 2013

Ս.թ. մայիսի 23-ին Բեյրութի Սուրբ Նշան Մայր եկեղեցու բակում տեղի է ունեցել Սումգայիթի եղեռնագործության 25-րդ տարելիցին նվիրված խաչքարի բացման արարողություն: Միջոցառումն իրականացվել է Հայոց ցեղասպանության 100-ամյակի Լիբանանի կենտրոնական մարմնի, Փյունիկ» համահայկական հիմնադրամի և Լիբանանում ՀՀ դեսպանության նախաձեռնությամբ:
Հոգեհանգստյան արարողությունից և Խաչքարի հանդիսավոր բացումից հետո Հայոց ցեղասպանության 100-ամյակի Լիբանանի կենտրոնական մարմնի անունից ելույթ է ունեցել Ռաֆայել Ումուդյանը: Դատապարտելով Սումգայիթի եղեռնագործությունը՝ նա ընդգծել է, որ այն չհուսալքեց հայ ժողովրդին, այլ բարձրացրեց մեր ժողովրդի միասնականության ոգին, որի արդյունքը հանդիսացավ ազգային ազատագրական պայքարի հաղթանակը Արցախում:
ՀՀ հատուկ ահանձնարարություններով դեսպան, «Փյունիկ» հիմնադրամի հոգաբարձուների խորհրդի նախագահ Լևոն Սարգսյանը իր ելույթում նշել է, որ « 25 տարի առաջ Սումգայիթում տեղի ունեցավ հայ ժողովրդի նորագույն պատմության ամենամեծ ողբերգություններից մեկը: Հայ բնակչության հանդեպ իրականացված եղեռնագործությունը Ադրբեջանի իշխանությունների կողմից հստակ մշակված էթնիկ զտման և տեղահանման հրեշավոր քաղաքականության հերթական դրսևորումն էր: Սումգայիթյան ջարդերը փոխեցին Լեռնային Ղարաբաղի հակամարտության բնույթը. ԼՂ ժողովուրդը ստիպված եղավ իր ազատ ապրելու արդարացի իրավունքը պաշտպանել արյան գնով… և մեր ժողովրդի միասնականության և համախմբվածության, Հայաստան-Արցախ-Սփյուռք եռամիասնականության շնորհիվ մենք ունենք ազատ, անկախ ու համաչափ զարգացող Արցախ»: Դեսպան Սարգսյանի համոզմունք հայտնեց, որ ներկայիս բոլոր մարտահրավերները մեր ժողովուրդը դիմակայելու է Հայաստան-Արցախ-Սփյուռք եռամիսնականության և անկոտրուն կամքի շնորհիվ:
Լիբանանի Հայոց թեմի առաջնորդ Գեղամ արք. Խաչերյանն իր արտասանած խոսքում նշել է, որ Ս. Նշան Մայր եկեղեցու բակում կանգնեցված խաչքարը հայ մշակույթի ազգային ու հոգևոր խորհրդանիշ է, արդարադատության պահանջի և բողոքի կոթող:
Հանդիսությանը ներկա էին պետական նախարար Փանոս Մանճյանը, խորհրդարանի անդամներ, հայ համայնքի տարբեր կառույցների ղեկավարներ և ներկայացուցիչներ, ՀՀ դեսպանության դիվանագիտական ողջ անձնակազմը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր