Հայոց ցեղասպանության 98-ամյակին նվիրված ոգեկոչման միջոցառումներ Լիբանանում

24 ապրիլի, 2013

Լիբանանում տեղի են ունեցել բազմաթիվ միջոցառումները՝ նվիրված Հայոց ցեղասպանության 98-րդ տարելիցին: Ոգեկոչման միջոցառումներն անց են կացվել միութենական, կուսակցական, հարանվանական, երիտասարդական, ուսանողական և աշակերտական մակարդակով:
Ապրիլի 23-ի երեկոյան Անթիլիասի մայրավանքի բակում Հայոց ցեղասպանության 100-ամյակի Լիբանանի երիտասարդական կենտրոնական մարմնի նախաձեռնությամբ տեղի է ունեցել «Հսկումի երեկո»: Միջոցառման մոտ 3000 ներկաների շարքում էին Լիբանանի խորհրդարանի հայազգի պատգամավորները, նախարարները, Լիբանանում ՀՀ դեսպանության դիվանագիտական ողջ անձնակազմը, հայ քաղաքական կուսակցությունների ղեկավարները, հայ հարանվանությունների հոգևոր առաջնորդները, հասարակական, հայրենակցական և երիտասարդական կազմակերպությունների ներկայացուցիչները: Պաշտոնական ելույթներից հետո ցուցադրվել է ֆիլմ Հայոց ցեղասպանության մասին, ներկաների ուշադրությանն է ներկայացվել հարուստ գեղարվեստական ծրագիր երգչախմբերի և երաժշտական տարբեր խմբերի կատարմամբ:
Ապրիլի 24-ին առավոտյան Անթիլիասի Ս. Գրիգոր Լուսավորիչ Մայր տաճարում մատուցվեց հանդիսվոր Սուրբ Պատարագ, որին Մայրավանքի բակում հաջորդեց հոգեհանգստյան արարողություն՝ նվիրված Մեծ Եղեռնի զոհերի հիշատակին: Հարյուրավոր ներկաներին իր հայրապետական պատգամը փոխանցեց Մեծի Տանն Կիլիկիո կաթողիկոս Ն.Ս.Օ.Տ.Տ. Արամ Ա-ը: Ներկաներին ընթերցվեց Ամենայն Հայոց Կաթողիկոս Գարեգին Բ-ի և Մեծի Տանն Կիլիկիո կաթողիկոս Արամ Ա-ի համատեղ հայտարարությունը: Այնուհետև Անթիլիասի մայրավանքի բակում գտնվող «Նահատակաց հուշարձանի» մոտ ծաղկեպսակներ զետեղեցին Լիբանանի Հայոց ցեղասպանության 100-անյակի մարմինը, ՀՀ դեսպանության անունից Լիբանանում ՀՀ դեսպան Աշոտ Քոչարյանը, հայկական կուսակցությունների ղեկավարները, ազգային, հայրենակցական, երիտասարդական, մշակութային և այլ կառույցների ներկայացուցիչները:
Օրվա երկրորդ կեսին Բուրջ Համուտի հրապարակից կազմակերպվեց բազմահազարանոց քայլարշավ դեպի Բեյրութի կենտրոնում գտնվող Նահատակների հրապարակ: Ելույթներով հանդես եկան Լիբանանի Հայոց ցեղասպանության 100-ամյակի կենտրոնական մարմնի և հայ քաղաքական կուսակցությունների ներկայացուցիչները: Ընթերցվեց ՄԱԿ-ին ուղղված հուշագիրը, որը կփոխանցվի Լիբանանի ՄԱԿ-ի գրասենյակ ապրիլի 25-ին:
Ապրիլի 24-ի երեկոյան Ս. Գրիգոր Լուսավորիչ ճեմարանի բակում մատուցվեց Հայոց ցեղասպանության նահատակների հիշատակին նվիրված Սուրբ Պատարագ Տանն Կիլիկիո Կաթողիկե Կաթողիկոս Պատրիարք Ներսես Պետրոս ԺԹ-ի նախագահությամբ: Պատարագից հետո Հայ կաթողիկե պատրիարքարանի բակում տեղադրված Մեծ Եղեռնի հուշակոթողի մոտ տեղի ունեցավ հոգեհանգստյան և ծաղկեպսակների զետեղման արարողություն՝ Լիբանանի հայ համայնքի բոլոր կառույցների, Լիբանանում ՀՀ դեսպանի և ՀՀ դեսպանության անձնակազմի մասնակցությամբ:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր