Մամուլի ասուլիս և պարգևների հանձնման հանդիսավոր արարողություն

13 դեկտեմբերի, 2012

Դեկտեմբերի 13-ին Լիբանանում ՀՀ դեսպանությունում կայացել է մամուլի ասուլիս և ՀՀ Սփյուռքի նախարարության կողմից լիբանանահայ համայնքի ներկայացուցիչներին շնորհված պարգևների հանձնման հանդիսավոր արարողություն:
Լիբանանում ՀՀ դեսպան Աշոտ Քոչարյանն ամփոփել է դեսպանության ընթացիկ տարվա աշխատանքները և ներկայացրել ՀՀ Նախագահ Սերժ Սարգսյանի նոյեմբերի վերջին Լիբանան կատարած պաշտոնական այցի մանրամասները: Դեսպանը նշել է, որ ՀՀ Նախագահի այցը Լիբանան 2012թ. քաղաքական և պատմական ամենախոշոր իրադարձությունն էր երկու բարեկամ երկրների ժողովուրդների պատմամշակութային դարավոր հարաբերությունների ենթատեքստում: Նա ընդգծել է, որ ՀՀ Նախագահի այցը Լիբանան նոր լիցք է հաղորդել երկկողմ հարաբերությունների ընդլայնմանը, Հայաստան-Սփյուռք արդյունավետ փոխգործակցության շարունակությանը :
Այնուհետև դեսպան Քոչարյանը լիբանանահայ վաստակաշատ արվեստագետներ Լյուսի Թյությունջյանին և Ջոն Գյուվդերլյանին հանձնել է ՀՀ Սփյուռքի նախարարության «Արշիլ Գորկի» մեդալը: «Հայրենիք-Սփյուռք գործակցության զարգացմանը նպաստելու, հայապահպանության, հայ մշակույթի զարգացման և տարածման գործում ունեցած նշանակալի ավանդի համար» ՀՀ Սփյուռքի նախարարության պատվոգրերով պարգևատրվել են Հայկազյան համալսարանը, Համազգային հայ կրթական և մշակութային միությունը, «Թեքեյան» մշակութային միությունը, «Զարթոնք» և «Արարատ» օրաթերթերը, «Նոր սերունդ» մշակութային միությունը, «Խոսնակ» և Մասիս» ամսագրերը, «Հասկ» և «Ավետիք» պարբերականները, «,«Բագին» գրական - մշակութային ամսագիրը:
«Սփյուռքում Հայ ինքնության պահպանման, հայեցի կրթության և դաստիարակության, կրթական գործի կազմակերպման և զարգացման բնագավառում ունեցած վաստակի համար և ուսուցչի օրվա կապակցությամբ» պատվոգրեր են ստացել մանկավարժներ Մաքրուհի Ունճյանը՝ Հայ Ավետարանական քոլեջ, Լենա Պալըքճյան-Պասմաճյանը՝ ՀԲԸՄ Պողոս Գ. Կարմիրյան Վարժարան, Շուշիկ Մավիսաքալյան-Թորոսը՝ Մելանքթոն և Հայկ Ասլանյան ճեմարան, Կարպիս Գապասագալյանը՝ Հռիփսիմյանց երկրորդական բարձրագույն վարժարան:
ՀՀ դեսպանը շնորհավորել է պարգևատրվողներին, շնորհակալություն է հայտնել հայ համայնքի բոլոր կառույցներին հայ մշակույթի զարգացման, հայապահպանման գործում ունեցած ավանդի, հայանպաստ գործունեության, ինչպես նաև դեսպանության հետ սերտ համագործակցության համար:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր