Բեյրութի Թեքեյան մշակութային միությունը կազմակերպել էր տոնական երեկո՝ նվիրված ՀՀ անկախության հռչակման 21րդ տարեդարձին

28 սեպտեմբերի, 2012

Երեկոն բացեց միության ատենապետ Արամ Սեպեջյանը: Այնուհետև ելույթով հանդես եկավ միջոցառման գլխավոր բանախոս, Լիբանանում ՀՀ դեսպան Աշոտ Քոչարյանը: Նա մանրամասնորեն ներկայացրեց ՀՀ անկախության տարիների նվաճումներն ու մարտահրավերները, անդրադարձավ ՀՀ արտաքին քաղաքականության հիմնական ուղղություններին, ԼՂ հիմնախնդրի կարգավորման գործընթացին, օրենսդրական բարեփոխումներին, տնտեսական զարգացումներին, Հայաստան-Սփյուռք գործակցությանը, հայ-լիբանանյան եկկողմ բարեկամական հարաբերություններին:
Ներկաներին շնորհավորելով ՀՀ անկախության օրվա առթիվ, դեսպան Քոչարյանը նշել է, «այսօր մենք ունենք կայացած և ամրացած հայոց պետություն, հզոր հայոց բանակ, քաղաքական կայունություն, զարգագող տնտեսություն, ուժեղ ֆինանսական համակարգ, կանգուն հասարակական կառույցներ, իր իրավունքներին իրազեկված բնակչություն: Չնայած Ադրբեջանի և Թուրքիայի կողմից շարունակվող անօրինական շրջափակման, համաշխարհային ֆինանսատնտեսական ճգնաժամի և տարածաշրջանային համագործակցության բացակայության, Հայաստանում արձանագրվում է տնտեսական աճ, աստիճանաբար հաղթահարվում են տնտեսական, ֆինանսական և սոցիալական լրջագույն մարտահրավերները, ստեղծվում են նոր աշխատատեղեր, իրականացվում են մեծածավալ շինարարական աշխատանքներ, ակնառու հաջողություններ են գրանցվում տեղեկատվական տեխնոլոգիաների, զբոսաշրջության, գյուղատնտեսության, փոքր և միջին ձեռնարկություններին օժանդակության ոլորտներում, տպավորիչ նվաճումներ են գրանցվում մշակույթի և սպորտի բնագավառներում: Ընդլայնվում է ՀՀ դիվանագիտության աշխարհագրությունը, բարձրանում է Հայաստանի հեղինակությունն ու դերակատարությունը միջազգային գործընթացներում, երկիրը գրավիչ է դառնում աշխարհասփյուռ մեր հայրենակիցների և օտարերկրյա զբոսարշջիկների համար: Հայաստանում անց են կացվում կարևոր միջազգային գագաթաժողովներ ու համաժողովներ, կինո և երգի փառատոններ, սպորտային մրցաշարեր, համաշխարհային և համահայկական կարևորություն ունեցող միջոցառումներ»:
Երեկոյի ընթացքում հնչեցին երաժշտական կատարումներ, ասմունք, ցուցադրվեց ֆիլմ Հայաստանի մասին:
Եզրափակիչ փոսքով հանդես եկավ Լիբանանի թեմի առաջնորդ Գեղամ արքեպիսկոպոս Խաչերյանը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր