«ՀՀ բանկային ոլորտի նոր իրականությունը» խորագրով Բեյրութում կազմակերպված կլոր սեղան

30 մարտի, 2012

"ՀՀ բանկային ոլորտի նոր իրականությունը" խորագրով Բեյրութում կազմակերպված կլոր սեղան

Ս.թ. մարտի 30-ին Բեյրութի "Phoenicia" հյուրանոցում տեղի է ունեցել կլոր սեղան՝ նվիրված Հայաստանի բանկային համակարգին: Կլոր սեղանը կազմակերպվել էր ՀՀ կենտրոնական բանկի, ՀՀ բանկերի միության եւ Լիբանանում ՀՀ դեսպանության համատեղ ջանքերով:

Ողջույնի խոսքով հանդես է եկել Լիբանանում ՀՀ դեսպան Աշոտ Քոչարյանը: Նա շնորհակալություն է հայտնել ներկաներին կարեւորագույն ու աննախադեպ կլոր սեղանի աշխատանքներին մասնակցելու համար եւ համոզմունք հայտնել, որ ֆորումը կծառայի իր նպատակներին, կբացահայտի լիբանանահայ գործարարների եւ բանկային ոլորտի ներկայացուցիչների ամբողջական ներուժը՝ հետագա համագործակցության համատեքստում: Դեսպան Քոչարյանը նշել է, որ Հայաստանում ակնառու հաջողություններ են գրանցվում տեղեկատվական տեխնոլոգիաների, գյուղատնտեսության, փոքր եւ միջին ձեռնարկություններին օժանդակության ոլորտներում, բիզնեսի համար ստեղծվում է կայուն եւ բարենպաստ միջավայր, արձնագրվում է տնտեսական աճ:

Այնուհետեւ ՀՀ կետրոնական բանկի նախագահ Արթուր Ջավադյանը ներկայացրել է պատվիրակության Բեյրութ ժամանելու նպատակը. լիբանանահայությանը ծանոթացնել ՀՀ կենտրոնական բանկի եւ բանկային համակարգի գործունեության առանձնահատկությունների հետ : Նա կարեւորել է կլոր սեղանի անցկացումը Լիբանանում եւ հույս հայտնել, որ գործարար հանդիպումները կունենան շարունակական բնույթ: Հայաստանի բանկերի միության նախագահ Աշոտ Օսիպյանը հակիրճ ներկայացրել է անկախության 20 տարիների ընթացքում Հայաստանի բանկային համակարգի զարգացումը եւ ներկա վիճակը:

Այնուհետեւ տեղի է ունեցել աշխատանքային նիստ, որի ընթացքում ՀՀ կենտրոնական բանկի Ֆինանսական համակարգի կայունության եւ զարգացման վարչության պետ Վահե Վարդանյանը հանդես է եկել "Հայաստանի ֆինանսական համակարգը՝ ընդլայնում եւ կայունություն» խորագիրը կրող զեկույցով եւ մանրամասն վիճակագրական տվյալներ ներկայացրել Հայաստանի բանկային եւ ֆինանսական համակարգի մասին: Այնուհետեւ «Հայաստանի բանկային համակարգը՝ զարգացումները եւ միտումները" թեմայով զեկույց է ներկայացրել Հայաստանի բանկերի միության գործադիր տնօրեն Սեյրան Սարգսյանը: Նա ներկայացրել է Հայաստանի բանկային համակարգի ներկա վիճակը եւ զարգացման միտումները:

Քննարկումների ընթացքում ՀՀ պատվիրակության անդամները սպառիչ պատասխաններ եւ պարզաբանումներ են տվել բարձրացված բազմաթիվ հարցերին :

Կլոր սեղանին հաջորդել է ընդունելություն, որի ժամանակ շուրջ 120 հրավիրյալներ հնարավորություն են ստացել ամբողջական տեղեկատվության ստանալ իրենց հետաքրքրող հարցերին:

Կլոր սեղանը մեծ հետաքրքրություն էր առաջացրել լիբանանահայության շրջանակներում: Ներկայացուցչական միջոցառմանը մասնակցում էին հայազգի նախարարներ եւ պատգամավորներ, քաղաքական կուսակցությունների ղեկավարներ, բանկային ոլորտի ներկայացուցիչներ, գործարարներ, Բուրջ Համուտի եւ Այնճարի քաղաքապետերը, ինչպես նաեւ Բիբլոս եւ Քրեդիտ բանկերի ղեկավարները:

Բեյրութ կատարած այցի շրջանակներում ՀՀ պատվիրակությունը հանդիպում է ունեցել Լիբանանի կենտրոնական բանկի կառավարիչ Ռիադ Սալամեի եւ բանկերի ասոցիացիաների նախագահ Ժոզեֆ Թորբեի հետ:

ՀՀ պատվիրակությունը, որի կազմում էին հատուկ հանձնարարություններով դեսպան Լեւոն Սարգսյանը, Հայաստանի 12 բանկերի ղեկավարներ եւ ներկայացուցիչներ, այցելել է նաեւ ՀՀ դեսպանություն:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր