Նախագահ Սերժ Սարգսյանն ընդունել է Լիբանանի Ազգային Ժողովի նախագահ Նաբիհ Բըրրիին

04 հոկտեմբերի, 2011

Հոկտեմբերի 04-ին Նախագահ Սերժ Սարգսյանն ընդունել է Լիբանանի Ազգային Ժողովի նախագահ Նաբիհ Բըրրիին:

Ողջունելով հյուրին` Հանրապետության ղեկավարը նշել է, որ հայ ժողովուրդը նրան ճանաչում է որպես բարեկամի: «Հայ-լիբանանյան հարաբերություններն ավանդաբար բարեկամական բնույթ են կրել: Մեզ միավորում են ինչպես մեր պատմամշակութային ընդհանրությունները, այնպես էլ հայ համայնքի առկայությունը Լիբանանում: Այդ հարաբերությունները մշտապես պահպանվել ու ամրապնդվել են բարձր մակարդակի քաղաքական այցելություններով, և մենք Ձեր այցը դիտում ենք այդ համատեքստում»,- ասել է Նախագահ Սերժ Սարգսյանը` խնդրելով նախագահ Միշել Սուլեյմանին փոխանցել իր ջերմ ողջույններն ու բարեմաղթանքները, նաև` Հայաստան այցի հրավերի վերահաստատումը:

Լիբանանի ԱԺ նախագահը շնորհակալություն է հայտնել ջերմ ընդունելության համար և նշել, որ 14 տարի հետո կրկին այցելելով Հայաստան, զգալի փոփոխություններ ու առաջընթաց է տեսնում ու համոզված է, որ Հայաստանին լավ ապագա է սպասվում: Նաբիհ Բըրրին կարևորել է քաղաքական բարձր մակարդակի հարաբերություններին զուգահեռ երկու երկրների միջև տնտեսական համագործակցության զարգացումը: Նա նշել է, որ Հայաստանի խորհրդարանի նախագահի և վարչապետի հետ հանդիպումների ժամանակ այդ հարցերին ևս անդրադարձ է եղել, որոշակի պայմանավորվածություններ են ձեռք բերվել տնտեսական հարաբերություններն ակտիվացնելու ուղղությամբ:

Նախագահ Սերժ Սարգսյանը և Լիբանանի ԱԺ նախագահն անդրադարձել են նաև տարածաշրջանային խնդիրներին ու արաբական աշխարհում տեղի ունեցող զարգացումներին: Նաբիհ Բըրրին նշել է, թե համոզված է, որ աշխարհի ոչ մի երկրում հնարավոր չէ խնդիրները կարգավորել առանց երկխոսության:

Խոսելով Հայաստան-Թուրքիա հարաբերությունների մասին` Լիբանանի ԱԺ նախագահն ընդգծել է, որ իր երկիրը ցանկանում է, որպեսզի Թուրքիան վավերացնի հայ-թուրքական արձանագրությունները, երկու երկրների միջև հարաբերությունները կարգավորվեն և տարածաշրջանում հաստատվի խաղաղություն:

ԼՂ հակամարտության կարգավորման հետ կապված, Նաբիհ Բըրրին վերահաստատել է դեռևս 1997 թ. Հայաստան կատարած իր այցի ժամանակ ասածը` Լեռնային Ղարաբաղի ժողովուրդն ինքը պետք է որոշի իր ապագան:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր