ՀՀ Սփյուռքի նախարար Հրանուշ Հակոբյանի այցը Լիբանան

25 մարտի, 2010

ՀՀ Սփյուռքի նախարար Հրանուշ Հակոբյանի աշխատանքային այցը Լիբանան

Ս.թ. մարտի 25-ից 29-ը ՀՀ Սփյուռքի նախարար Հրանուշ Հակոբյանը աշխատանքային այցով գտնվում էր Լիբանանում:

Ս.թ. մարտի 26-ին ՀՀ Սփյուռքի նախարարը ՀՀ դեսպանության շենքում հանդիպում է ունեցել Լիբանանի հայ համայնքի ղեկավար մարմինների ներկայացուցիչների հետ: Հանդիպմանը մասնակցում էին կրոնական առաջնորդներ, նախարարներ, պատգամավորներ, քաղաքական կուսակցությունների, ՀԲԸՄ-ի, Համազգայինի և հայկական այլ կառույցների ղեկավարներ, լրատվամիջոցների ներկայացուցիչներ: ՀՀ դեսպան Աշոտ Քոչարյանի ներածական խոսքից հետո ելույթով հանդես է եկել Հրանուշ Հակոբյանը: Նա ներկայացրել է մանրամասներ ՀՀ Նախագահ Սերժ Սարգսյանի Սիրիա կատարած այցի մասին, անդրադարձել Հայոց ցեղասպանության միջազգային ճանաչման, ԼՂ հակամարտության կարգավորման գործընթացներին, Հայաստան-Սփյուռք գործակցության հեռանկարներին և ՀՀ կառավարության մոտեցումներին:

ՀՀ Սփյուռքի նախարար Հրանուշ Հակոբյանը այցելել է «Ազդակ», «Արարատ», և «Զարթօնք» թերթերի խմբագրություններ: Նա այցելել է «Ազդակ»-ի «Փյունիկ» սրահ, որտեղ Համազգայինի «Վահե Սեթյան» հրատարակչատան կողմից կազմակերպվել էր մանկապատանեկան հրատարակությունների ցուցահանդես:

Հրանուշ Հակոբյանը «Թեքեյան մշակութային կենտրոն»-ում հանդիպում է ունեցել Ռամկավար Ազատական կուսակցության ղեկավար մարմնի անդամների, ինչպես նաև «Զարթօնք» թերթի տնօրինության հետ:

«Վանա Ձայն» ռադիոկայանում Հրանուշ Հակոբյանը հարցազրույց է տվել ուղիղ հեռարձակմամբ: «Ռադիո Սևանի» խմբագրությունում նախարարը հանդիպում է ունեցել ռադիոկայանի անձնակազմի և ղեկավարության հետ: Նախարարը մասնակցել է «Ռադիո Սևան» - ՀՀ Սփյուռքի նախարարություն հեռուստակամուրջին և ուղիղ եթերում պատասխանել ռադիոկայանի լրագրողի հարցերին:

Հանդիպում Լիբանանի ԱԳ և էմիգրանտների նախարար Ալի Շամիի հետ

Մարտի 26-ին ՀՀ Սփյուռքի նախարար Հրանուշ Հակոբյանը հանդիպել է Լիբանանի ԱԳ և էմիգրանտների նախարար Ալի Շամիի հետ: Զրուցակիցները գոհունակություն են հայտնել երկկողմ բարեկամական հարաբերությունների ներկա մակարդակի վերաբերյալ: Նշվել է, որ ՀՀ կառավարությունը բարձր է գնահատում Լիբանանի կառավարության հավասարակշռված կեցվածքը Լեռնային Ղարաբաղի հակամարտության կարգավորման հարցում և եղբայրական վերաբերմունքը լիբանանահայության հանդեպ:

Նախարար Ալի Շամին իր հերթին բարձր է գնահատել հայ համայնքի ակտիվ ներգրավվածությունն ու կարևոր դերակատարությունը Լիբանանի քաղաքական և հասարակական կյանքում: Նա նշել է, որ Լիբանանը բարձր է գնահատում Հայաստանի ջանքերը տարածաշրջանում խաղաղություն հաստատելու ուղղությամբ: Քննարկվել են նաև ՀՀ Սփյուռքի նախարարության և Լիբանանի ԱԳ և էմիգրանտների նախարարության միջև փոխշահավետ համագործակցության հնարավորություններին և հեռանկարներին առնչվող հարցեր:

Մարտի 27-ին Հայկազյան համալսարանի հանդիսասրահում տեղի է ունեցել ՀՀ Սփյուռքի նախարար Հրանուշ Հակոբյանի հանդիպում-զրույցը կրթության բնագավառի լիբանանահայ ներկայացուցիչների հետ: Նախարար Հակոբյանը ներկայացրել է կրթության բնագավառում տիրող իրավիճակը, ոլորտի կարիքները և ապագայի ծրագրերը: Հայաստանի և Սփյուռքի միջև կրթության բնագավառում համագործակցության առումով նախարարը կարևորել է Սփյուռքի փորձը օգտագործելու անհրաժեշտությունը համահայկական դասագրքեր կազմելու գործում: Նա ընդգծել է հայ ուսուցիչների առաքելության կարևորությունը, անդրադառձել է նաև Հայաստանում սփյուռքահայ ուսանողների առջև ծառացած դժվարությունների հարթման ուղղությամբ կատարվող աշխատանքներին:

Մարտի 28-ին ՀՀ Սփյուռքի նախարար Հրանուշ Հակոբյանի նախագահությամբ, Հայ կոթողիկե համայնքի Ներսես Պետրոս ԺԹ պատրիարքի հովանավորությամբ ՀԿՄ-ի «Արարատյան» սրահում տեղի է ունեցել «Ս. Գրիգոր Նարեկացի» կենտրոնի բացման հանդիսությունը:

ՀՀ Սփյուռքի նախարարը այցելել է նաև Համազգայինի «Վահե Սեթյան» հրատարակչատուն և ծանոթացել Համազգայինի հրատարակչական և գրատարածման գործունեությանը: Տիկին Հակոբյանը այցելել է նաև Համազգայինի «Լյուսի Թութունջյան» և «Նոյան Տապան» ցուցասրահները:

Ս.թ. մարտի 29-ի առաջին կեսին ՀՀ Սփյուռքի նախարարն այցելել է մի շարք հայկական կրթօջախներ` Ասլանյան վարժարանը, Գևորգ Հարբոյան, Եղիշե Մանուկյան, Դարուհի Հովակիմյան դպրոցները, որտեղ իր սրտի խոսքը և պատգամն է հղել հայկական կրթօջախների մանկավարժներին ու աշակերտներին:

Նույն օրը Հրանուշ Հակոբյանն այցելել է Լիբանանի Օգնության Խաչ կազմակերպություն, Հայկական Բարեգործական Ընդհանուր միություն, «Թռչնոց Բույն» մանկատուն, հարցազրույց տվել «Վանա Ձայն» ռադիոկայանին, որի ընթացքում ամփոփել է Լիբանան կատարած այցի արդյունքները:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր