Հոգեհանգստյան արարողություն զոհված հայ օդաչուների հիշատակին

30 նոյեմբերի, 2014

Ս.թ. նոյեմբերի 30-ին Ս.Դ.Հ.Կ. Տխրունի ուսանողական երիտասարդական միության նախաձեռնությամբ Սբ. Գևորգ եկեղեցում տեղի ունեցավ հոգեհանգստյան արարողություն, այնուհետև մոմավառություն՝ ի հիշատակ ս.թ. նոյեմբերի 12-ին Ադրբեջանի կողմից խոցված ԼՂՀ պաշտպանության բանակի ուղղաթիռի զոհ դարձաձ հայ օդաչուների: Ձեռնարկին մասնակցեցին Լիբանանում ՀՀ դեսպան Աշոտ Քոչարյանը, դեսպանության խորհրդական Աշոտ Վարդանյանը, Ս.Դ.Հ.Կ Լիբանանի շրջանային վարչական մարմնի անդամները, Տխրունի ուսանողական երիտասարդական միության ներկայացուցիչները:

Արարողությունից հետո սրահում կազմակերպված հիշատակի ձեռնարկին բացման խոսքով հանդես եկան Տխրունի երիտասարդական միության անդամ Տիգրան Միհրանյանը: Ս.Դ.Հ.Կ Լիբանանի շրջանային վարչական մարմնի անդամ Հակոբ Կերկերյանը խոսեց արցախյան հակամարտության մասին, ներկայացրեց տեղեկություններ զոհված օդաչուների մահվան մասին:

Եզրափակիչ խոսքում Լիբանանում ՀՀ դեսպան Աշոտ Քոչարյանը նշեց, որ Հայաստանի արտաքին քաղաքական թիվ մեկ մարտահրավերը շարունակում է մնալ արցախյան հիմնահարցի խաղաղ կարգավորումը: Դեսպանն անդրադարձավ Ադրբեջանի կողմից ԼՂ պաշտպանության բանակի ուղղաթիռի խոցման ոճրագործությանը՝ նշելով, որ այդ քայլը հերթական սադրանք էր իրավիճակը սրելու և բանակցային գործընթացը խափանելու նպատակով: Բաքուն ևս մեկ անգամ ապացուցեց, որ անտեսում է Մինսկի խմբի համանախագահների և միջազգային հանրության կոչերն ուժի չկիրառման, հրադադարի ամրապնդման և վստահության ամրապնդման միջոցառումների վերաբերյալ՝ դրանով իսկ պատասխանատվություն ստանձնելով իրավիճակի սրման համար:

Դեսպան Քոչարյանը հիշատակեց ՀՀ Նախագահ Սերժ Սարգսյանի խոսքերը այն մասին, որ նոր Հայաստանին այլևս անհնար է խաբել կամ ահաբեկել, անհնարին է պարտադրել կամ շանտաժի ենթարկել: Նա ընդգծեց, որ մեր հերոսների հատուկ գործողության շնորհիվ հաջողվեց զոհված տղաների դիակները դուրս բերել կրակի տակից և ապացուցել աշխարհին, որ հայ ժողովուրդը հաղթանակում է նույնիսկ ամենածանր պայմաններում, ցուցաբերելով արիություն, կամք, վճռականություն և տոկունություն: Դեսպանը համոզմումք հայտնեց, որ միայն Հայաստանի, Արցախի և Սփյուռքի միասնակությամբ և նվիրվածությամբ կարելի է հաղթահարել հայ ժողովրդի առջև ծառացած բոլոր մարտահրավերները:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր